၂၀၂၃ ဇူလိုင် ၂၀ 

ဒေါ်​အောင်ဆန်းစုကြည်ကို ထိုင်းနိုင်ငံဝန်ကြီးချုပ်နှင့် နိုင်ငံခြား​ရေးဝန်ကြီး Don Pramudwinai လာ​ရောက်​တွေ့ဆုံခဲ့သည့်သတင်းနှင့်ပတ်သက်ပြီး အ​တော်​လေးကိုလှုပ်လှုပ်ရှားရှားဖြစ်သွားတာ​တွေ့ရပါသည်။

တွေ့သည့်အချိန်ကလည်း အာဆီယံ နိုင်ငံခြား​ရေးဝန်ကြီးများအစည်းအ​ဝေးနှင့် အချိန်ကိုက်ဖြစ်​နေတာက ပိုမိုစိတ်ဝင်စားစရာဖြစ်ခဲ့ရပါသည်။ ​ထိုင်းနိုင်ငံခြား​ရေးဝန်ကြီးက ဒေါ်​အောင်ဆန်းစုကြည်နှင့်​တွေ့ဆုံခဲ့တာကို ​တွေ့ဆုံပြီး​နောက်သတင်းထုတ်ပြန်ခြင်းမပြုခဲ့ဘဲအာဆီယံအစည်းအ​ဝေး​ရောက်မှသာထုတ်​ဖော်​ပြောဆိုခဲ့တဲ့အတွက်လည်း သို့​လောသို့​လော ဖြစ်သွားခဲ့ကြတာ​တွေ့ရပါသည်။

ထိုင်းနိုင်ငံခြား​ရေးဝန်ကြီး၏အ​ပြောနှင့် သတင်းထုတ်ပြန်ချက်များအရ ​ဒေါ်​အောင်ဆန်းစုကြည်၏ သ​ဘောထားဟာ NUG နှင့် PDF များအတွက် တုန်လှုပ်စရာဖြစ်ခဲ့ရပါသည်။ PanOrient News ၏ သတင်း​ဖော်ပြချက်မှာ "သတင်းအ​ခြေအမြစ်များအရ​အောင်ဆန်းစုကြည်က အဆိုပါ​တွေ့ဆုံပွဲမှာ အ​နောက်နိုင်ငံများက​​ထောက်ခံမှုပြုပြီး အကြမ်းဖက်ဝါဒကိုလက်ကိုင်ထား၍ အပြစ်မဲ့ပြည်သူများကိုသတ်ဖြတ်လျှက်ရှိသည်ဟု စွပ်စွဲထားသည့် PDF ကို​သော်လည်း​ကောင်း၊ NUG ကို​သော်လည်း​ကောင်း သူမအ​နေဖြင့် အသိအမှတ်မပြုသလို ​ထောက်ခံခြင်းလည်းမပြု​ကြောင်း​ပြောကြားခဲ့ပါသည်။(ဘာသာပြန်)" ဟူ၍​ရေးသား​ဖော်ပြထားတာတွေ့ရပါသည်။

ထို့အပြင် ကျိုဒိုသတင်းဌာနကလည်း အဆိုပါသတင်းကို​ရေးသားခဲ့ပြီး ​ဒေါ်​အောင်ဆန်းစုကြည်နှင့်​တွေ့ဆုံစဥ် "မြန်မာနိုင်ငံရှိ ပဋိပက္ခများချုပ်ငြိမ်းရန် ​ဆွေး​နွေးပွဲများပြန်လည်ကျင်းပရမည်" ဟု​ ဒေါ်​အောင်ဆန်းစုကြည်က​ပြော​ကြောင်း၊ ထိုင်းနိုင်ငံခြား​ရေးဝန်ကြီးက ​"ဒေါ်​အောင်ဆန်းစုကြည်ကျန်းမာ​ရေး​ကောင်းတယ်။ ​ကောင်းတဲ့​တွေ့ဆုံမှုပါ။​ဒေါ်​အောင်ဆန်းစုကြည်ကို ​စေ့စပ်​ဆွေး​နွေးပွဲကျင်းပဖို့ တိုက်တွန်းခဲ့တယ်။ ​ဒေါ်​အောင်ဆန်းစုကြည်အ​နေနဲ့ အခုပြဿနာကို​တွေ့ဆုံ​ဆွေး​နွေး​ရေးနည်းလမ်းနဲ့သာအ​ဖြေရှာဖို့ပဲ လိုလားတယ်" ဟု အာဆီယံနိုင်ငံခြား​ရေးဝန်ကြီးများအစည်းအ​ဝေးမှာ သတင်း​ထောက်များနှင့်​တွေ့ဆုံစဥ်​ပြောကြားခဲ​ကြောင်း သတင်းမှာ​ဖော်ပြထားပါသည်။

ထိုကိစ္စနှင့်ပတ်သက်ပြီး NUG နိုင်ငံခြား​ရေးဒုဝန်ကြီး မိုး​ဇော်ဦးက " နိုင်ငံ​ရေးအရအသုံးချတာသာဖြစ်​ကြောင်း၊ မြန်မာစစ်တပ်နှင့် နီးကပ်သည့်ဆက်ဆံ​ရေးရှိသည့် ထိုင်းနိုင်ငံခြား​ရေးဝန်ကြီး၏ သတင်းဌာနများထံ​ ပြောဆိုချက်များကိုလည်း သံသယဖြင့်​စောင့်ကြည့်​နေ​ကြောင်း၊ အာဆီယံနိုင်ငံများအ​နေဖြင့် မြန်မာ့အ​ရေးကိုကြိုးပမ်း​ဆောင်ရွက်ရာတွင် မြန်မာပြည်သူလူထု၏သ​ဘောထားအတိုင်း​ဆောင်ရွက်ရန်လိုအပ်ပြီး အ​ခြေအ​နေများ ပိုမိုမရှုပ်​ထွေးရန်​​ဆောင်ရွက်သင့်​ကြောင်း၊ Don က အာဆီယံနိုင်ငံခြား​ရေးဝန်ကြီးများအစည်းအ​ဝေးမတိုင်မီ ​ဒေါ်​အောင်ဆန်းစုကြည်ကိုဘာလို့သွားပြီး​တွေ့ရတာလဲ။အဲ့ဒီအချက်ကိုစဥ်းစားစရာရှိ​ကြောင်း၊ တကယ်တမ်း​တွေ့ခွင့်ရှိသူက အာဆီယံလက်ရှိ ဥက္ကဋ္ဌအဖြစ်​ဆောင်ရွက်​​နေတဲ့အင်ဒိုနီးရှားနိုင်ငံသာဖြစ်​ကြောင်း၊ အာဆီယံအစည်းအ​ဝေးနဲ့ကပ်ပြီး​တွေ့ခွင့်​ပေးတာနဲ့ပတ်သက်ပြီး​တော်​တော်​လေးစဥ်းစားစရာရှိ​ကြောင်း"၊ ပြောကြားခဲ့ပါသည်။

NUG မှ နိုင်ငံခြား​ရေးဝန်ကြီး ဇင်မာ​အောင်က ကြိုတင်သတ်မှတ်ချက်များမပါဘဲ​ ဆွေး​နွေးပွဲများကို​ထောက်ခံမည်ဟု​ဒေါ်​အောင်ဆန်းစုကြည်က ​ပြောကြားခဲ့​ကြောင်းထိုင်းနိုင်ငံခြား​ရေးဝန်ကြီး၏​ပြောဆိုချက်နှင့်ပတ်သက်၍ "တရားမဝင်​ကြောင်း၊ တရားဝင်ဟုဆိုပါက နှစ်ဦးနှစ်ဘက်ပူးတွဲထုတ်ပြန်ရမှာဖြစ်​ကြောင်း၊ ယခုသတင်းများက တစ်ဖက်သတ်ဆန်​ကြောင်း" ​ပြောကြားခဲ့သည်ဟု The Irrawady- Burmese Edition သတင်းဌာနက ထုတ်လွှင့်ခဲ့ပါသည်။ ထို့အပြင်​ ဇင်မာ​အောင်နှင့်အင်တာဗျူးပြုလုပ်သည့် ဗီဒီယို​ခွေပါအွန်လိုင်းမှာ ထုတ်ပြန်ခဲ့သည်ကိုလည်း​တွေ့ရပါသည်။ ​ဇင်မာ​အောင်၏ ​ပြောကြားချက်များမှာ ​"ဒေါ်​အောင်ဆန်းစုကြည်ကို အသုံးချခြင်းဖြစ်​ကြောင်း၊ ​ဒေါ်​အောင်ဆန်းစုကြည်အ​နေဖြင့်ထိုသို့​ပြောမှာမဟုတ်​ကြောင်း၊ ​ ​ဒေါ်​အောင်ဆန်းစုကြည်ကိုပြန်လွှတ်​ပေးမှာမဟုတ်သည့်အတွက် နစကနှင့် ထိုင်းဒုဝန်ကြီးချုပ်တို့ လက်ဝါးခြင်းရိုက်ပြီးလုပ်ကြံထားခြင်းသာဖြစ်​ကြောင်း၊​ဒေါ်​အောင်ဆန်းစုကြည်အတွက် အသက်အန္တရာယ်ပင်စိုးရိမ်ရ​ကြောင်း" ​ပြောသွားတာ​တွေ့ရပါသည်။

ထိုကိစ္စနှင့်ပတ်သက်ပြီး အမျိုးသားဒီမိုက​ရေစီအဖွဲ့ချုပ်၊ အလုပ်​ကော်မတီကလည်း​ ဇူလိုင်လ ၁၄ ရက်​နေ့စွဲဖြင့် သတင်းထုတ်ပြန်ချက်အမှတ်(၈/၂၀၂၃) ကိုထုတ်ပြန်ခဲ့ပါသည်။

ထုတ်ပြန်ချက်မှာ လွတ်လပ်စွာပူးတွဲ​ပြောကြားနိုင်​သောအ​ခြေအ​နေမဟုတ်သည့်အတွက် စကားရပ်တိုင်းသည်စစ်မှန်သည်ဟုယူဆရန် သံသယရှိ​ကြောင်း၊ ​ဒေါ်​အောင်ဆန်းစုကြည်၏သ​​ဘောထားဖြစ်သည့်ဗဟိုအလုပ်အမှု​ဆောင်များ လွတ်လပ်စွာ စုံညီ အစည်းအ​ဝေးမကျင်းပနိုင်ဘဲသူမအ​နေဖြင့်မည်သည့်သ​ဘောထားများ၊ ဆုံးဖြတ်ချက်များကိုချနိုင်မည်မဟုတ် ဆိုတဲ့သ​ဘောထားနှင့် ပြည်သူလူထုကိုသာအ​ခြေခံပြီးပြည်သူလူထု၏ဆန္ဒသ​ဘောထားကိုမည်သည့်အခါမှဆန့်ကျင်မည်မဟုတ်ဆို​သောသ​ဘောထားများနှင့်ကွဲလွဲ​နေ​ကြောင်း၊​မြန်မာနိုင်ငံ​ရေးပြဿနာများ​ပြေလည်​ရေးလမ်းစအဖြစ်အ​ရေးပါလှ​သော​ဒေါ်​အောင်ဆန်းစုကြည်၏ဆန္ဒသ​ဘောထားကိုပြည်သူလူထုထံသို့ လွတ်လပ်စွာတင်ပြနိုင်ရန် အာဆီယံ​ခေါင်း​ဆောင်များအ​နေဖြင့် အာဆီယံဘုံသ​ဘောတူညီချက် ၅ ရပ်နှင့်အညီ ဒေါ်​အောင်ဆန်းစုကြည်အပါအဝင် မတရားဖမ်းဆီးခံထားရ​သော နိုင်ငံ​ရေးအကျဥ်းသားများအားလုံးအမြန်ဆုံးလွတ်​မြောက်၍ လွတ်လပ်စွာ သ​ဘောထားအမြင်​ဖော်ထုတ်နိုင်မှုကို အားစိုက်လုပ်​ဆောင်သင့်​ကြောင်းတိုက်တွန်းသည်ဟု​ရေးသား​ဖော်ပြထားပါသည်။

ထို​ကြေညာချက်​ရေးသားထုတ်ပြန်သည့်အဖွဲ့မှာတရားဝင် NLD မဟုတ်ဘဲ ပြည်ပကိုထွက်ခွာသွားသည့်​​အဖွဲ့များစုစည်းပြီး NLDအမည်ကို အသုံးချ​နေသူများပါဝင်သည့် အဖွဲ့သာဖြစ်ပါသည်။

ယခင်က ​ဒေါ်​အောင်ဆန်းစုကြည် လက်မခံအသိအမှတ်မပြုခဲ့သည့် NLD (LA) ကဲ့သို့သာဖြစ်သည်ဟုဆိုနိုင်ပါ၏။ ၄င်းတို့၏ထုတ်ပြန်ချက်သည်​ ​ဒေါ်​အောင်ဆန်းစုကြည်နှင့် NLD ကို ကိုယ်စားပြုသည်ဟု ယူဆ၍မရပါ။ အဆိုပါ​တွေ့ဆုံမှုသတင်းနှင့်ပတ်သက်ပြီး Ayeyarwaddy -Times သတင်းဌာနက ထိုင်းနိုင်ငံခြား​ရေးဝန်ကြီးကို ​ဒေါ်​အောင်ဆန်းစုကြည်လက်ခံ​တွေ့ဆုံခြင်းမရှိ ဟူ၍ သတင်းထုတ်ပြန်ခဲ့သည်ကိုလည်း​တွေ့ရှိရပါသည်။

အစိုးရကိုဆန့်ကျင်ပြီး NUG နှင့် PDF တို့ကို​ထောက်ခံသည့် အ​နောက်​မျှော်သတင်းဌာနအသီးသီး၏ သတင်းထုတ်ပြန်ချက်များအ​နေဖြင့် လက်ရှိ NUG ဆောင်ရွက်​နေသည့်လုပ်ရပ်များထိခိုက်မှာစိုးရိမ်​နေပြီး ​ဒေါ်​အောင်ဆန်းစုကြည်​ပြောသည့်​ပြောကြားချက်နှင့် အဆိုပါသတင်းကို ​သေးသိမ်​အောင်​ ဆောင်ရွက်​နေတာ​တွေ့ရပါသည်။ ထိုသတင်းနှင့်ပတ်သက်ပြီး နစက သတင်းထုတ်ပြန်​ရေးအဖွဲ့ ​ခေါင်း​ဆောင်က ​တွေ့ဆုံသည့် သတင်းမှာ မှန်​ကန်ကြောင်း အတည်ပြု​ပေးခဲ့တာ​တွေ့ရပါသည်။ "တိုင်းပြည်ကို တကယ်ချစ်ရင် လက်နက်ကိုင်လမ်းစဥ်​နောက် လိုက်မလား မှန်ကန်တဲ့နိုင်ငံ​ရေးလမ်း​ကြောင်း​နောက် လိုက်မလား" ဆိုတာစဥ်းစား​တွေး​ခေါ်တတ်သူတိုင်းမြင်နိုင်သည့်ကိစ္စဟု ဆိုရပါလိမ့်မည်။

​ဒေါ်​အောင်ဆန်းစုကြည်၏​ ပြောဆိုချက်နှင့်ပတ်သက်ပြီး ယခင်က ABSDF မှာ ကိုယ်တိုင်ပါဝင်ခဲ့ဖူးသည့် ​သန်းလွင်ထွန်း(​အောင်နိုင်) က ​"ဒေါ်​အောင်ဆန်းစုကြည်ဟာ သူ့အစ်ကိုဝမ်းကွဲ ​ဒေါက်တာစိန်ဝင်း ဦး​ဆောင်ပြီးပြည်ပတိမ်း​ရှောင် NLD အမတ်​တွေနဲ့ အတူဖွဲ့စည်းခဲ့တဲ့အ​ဝေး​ရောက် NCGUB အစိုးရ နဲ့ လက်နက်ကိုင်​တော်လှန်​ရေးကို အသိအမှတ်မပြုခဲ့ပါဘူး။ NLD(LA) ပြည်ပ​ရောက် NLD ဆိုတာကိုလည်း လက်မခံခဲ့ပါဘူး။" လို့ သူ့ရဲ့ Facebook အ​ကောင့်မှာ ​ရေးသားတင်ပြထားတာ​တွေ့ရပါသည်။

၈၈ အ​ရေးအခင်းမှာ ကိုယ်တိုင်ပါခဲ့ပြီး လက်ရှိ တရားဝင်ပါတီနိုင်ငံ​ရေးလမ်း​ကြောင်းသည်သာလျှင်မှန်ကန်သည်ဟု ခံယူထားသူ ပြည်သူ့ပါတီ ဥက္ကဋ္ဌ ဦးကိုကိုကြီးက

" ​ဒါဟာမြန်မာ့နိုင်ငံ​ရေးအကျပ်အတည်းပြဿနာ​ပြေလည်ဖို့အတွက်တံခါးတစ်​ပေါက်၊ပြတင်း​ပေါက်တစ်​ပေါက်ပွင့်လာတယ်လို့သုံးသပ်​ကြောင်း၊ ဒေါ်​အောင်ဆန်းစုကြည်ရဲ့ လူထု​ထောက်ခံမှု အခန်းကဏ္ဍဟာလည်း အခုချိန်ထိ ကြီးကြီးမားမား ရှိ​နေတဲ့အခါကျ​တော့ ဒီလိုမျိုး ​ဒေါ်​အောင်ဆန်းစုကြည်ကို နိုင်ငံတကာဧည့်သည်နဲ့​တွေ့ဆုံခွင့်​ပေးလိုက်တဲ့အတွက်​ကြောင့် လက်ရှိပြဿနာ​ဖြေရှင်းဖို့အတွက် တစုံတရာ လမ်းစ​ပေါ်လာလိမ့်မယ်လို့​ မျှော်လင့်ပြီး​ ဆောင်ရွက်တာလည်းဖြစ်နိုင်​ကြောင်း၊" ​ပြောကြားခဲ့တာ​တွေ့ရပါသည်။

ထိုကိစ္စနှင့်ပတ်သက်ပြီး မင်းဇင်တို့အုပ်စုဖြစ်သည့် ISP- Myanmar ကလည်း "ယခု​တွေ့ခွင့်ပြုသည့်ကိစ္စဟာ အရင်စစ်အစိုးရအဆက်ဆက်ကကျင့်သုံးခဲ့တဲ့ စာအုပ်​ဟောင်းထဲကနည်းနာအတိုင်းလုပ်ခဲပုံဖြစ်​ကြောင်း၊ ဒီလို​တွေ့ဆုံမှု​တွေဟာ မြန်မာ့နိုင်ငံ​ရေးအကျပ်အတည်းကနေ ထွက်​ပေါက်အလှည့်အ​ပြောင်းကို မ​ရှေးရှု​စေခဲ့တာ​တော့သတိပြုစရာဖြစ်​ကြောင်း၊ အခုလည်း နိုင်ငံတကာမှာ မြန်မာ့အ​ရေးချဥ်းကပ်ပုံ သ​ဘောထား​တွေကွဲလွဲလာ​စေဖို့၊ ပြည်တွင်းအင်အားစု​တွေအကြား အက်​ကြောင်းထင်

ကွဲပြဲ​စေဖို့ကို​ ရှေးရှုနိုင်​ခြေပိုများ​ကြောင်း၊ လက်ရှိ​မြေပြင်အခင်းအကျင်း​တွေဟာ ​ဒေါ်​အောင်ဆန်းစုကြည် တစ်ဦးတည်းကို ဗဟိုပြုပြီးအ​ဖြေရှာရုံနဲ့မလုံ​လောက်​​တော့ကြောင်း၊ စစ်​ကောင်စီအ​ပေါ် နာကြည်းခံစားရမှု​တွေလည်းအရှိန်ရ​နေပြီး စိတ်ဒဏ်ရာ​တွေနဲ့ ပြင်းထန်တဲ့ သ​ဘောထား တင်းမာမှု​တွေလည်း အရှိန်ရ​နေဆဲမို့ ဒီလို လူတစ်ဦးတည်းကို ဗဟိုပြုအ​ဖြေရှာဖို့ အ​ခြေအ​နေမ​ပေးဘူးလို့သုံးသပ်နိုင်​ကြောင်း၊ ​ဒေါ်​အောင်ဆန်းစုကြည်ကိုနိုင်ငံတကာနှင့် ပိုချိတ်ဆက်ထိ​တွေ့​ပေးခြင်းအစ၊ ​နေအိမ်အကျယ်ချုပ် ပြန်ပို့တာအလယ်၊ နှစ်မ​စေ့ခင် အချိန်အများကြီး​စောပြီး ပြန်လွှတ်​ပေးတာအဆုံး ဒါ​တွေမဖြစ်နိုင်ဘူးလို့ လုံးလုံးဘူးခံမရနိုင်​တော့တဲ့ ဖြစ်တန်​ခြေတစ်ရပ် ဖြစ်လာပြီဖြစ်​ကြောင်း " စသဖြင့်သုံးသပ်ထားတာ​တွေ့ရပါတယ်။

​ဝေဖန်သုံးသပ်ချက်များကိုကြည့်လျှင် အတ္တ​နောမတိကိုအ​ခြေခံထားကြပြီး ကိုယ်လိုရာဆွဲ​တွေး၊ ဆွဲယူထားကြသည်ကိုထင်ရှားစွာ​တွေ့ရမှာ ဖြစ်ပါသည်။ မည်သို့ပင်ယူယူ မည်သို့ပင်ဆိုဆို ​ဒေါ်​အောင်ဆန်းစုကြည်နှင့် ထိုင်းနိုင်ငံခြား​ရေး​ဝန်ကြီးတို့ တွေ့ဆုံမှုနှင့်ပတ်သက်ပြီး အဓိက အကျဆုံးအချက်က လက်ရှိဖြစ်​ပေါ်​နေတဲ့ အ​ခြေအ​နေ​တွေအ​ပေါ်မှာ ထားရှိသည့် ​ဒေါ်​အောင်ဆန်းစုကြည်၏ သ​ဘောထားသာလျှင်ဖြစ်ပါလိမ့်မည်။ ​

ဒေါ်​အောင်ဆန်းစုကြည်သည် သူထင်ရာကိုသာတစ်ယူသန်ဆန်စွာ လုပ်တတ်သည့်သ​ဘာဝရှိသူဖြစ်သလို သူတစ်ပါးအကြိုက်ကိုလိုက် လုပ်တတ်သူလည်းမဟုတ်ပါ။ ယခု​တွေ့ဆုံမှုဟာ သူမ၏သ​ဘောထားမပါဘဲနှင့် မည်သို့မှဖြစ်လာလိမ့်မည် မဟုတ်ပါ။ ထိုင်းနိုင်ငံခြား​ရေးဝန်ကြီး၏ သိက္ခာ၊ နစကသတင်းထုတ်ပြန်​ရေးအဖွဲ့​ခေါင်း​ဆောင်၏ အတည်ပြုချက်များအရ ထို​တွေ့ဆုံမှုသည် နှစ်ဦးသ​ဘောတူ လက်ခံ​တွေ့ဆုံခြင်းသာ ဖြစ်ပါသည်။​ဒေါ်​အောင်ဆန်းစုကြည်ကိုယ်တိုင် ယုံကြည်၍​တွေ့ဆုံခဲ့သည်ဆိုတာ အငြင်းပွားစရာမရှိပါ။​ ဒေါ်​အောင်ဆန်းစုကြည်၏ သ​ဘောထားကို တိကျစွာ ရယူ​ဖော်ထုတ်​ပေးခဲ့သည့် ထိုင်းနိုင်ငံခြား​ရေးဝန်ကြီး၏လုပ်ရပ်ဟာ မိတ်​ဆွေဝတ္တရား​ ကျေပွန်သည့် လုပ်ရပ်အဖြစ်အသိအမှတ်ပြုရမှာ ဖြစ်ပါသည်။

​လက်ရှိ CRPH ၊ NUG နှင့် PDF တို့ ၏ လုပ်ရပ်များသည် ​ဒေါ်​အောင်ဆန်းစုကြည်၏ သ​ဘောထားနှင့် ရပ်တည်ချက် မဟုတ်သည်ကို ထင်ရှားစွာ သိရှိပြီးဖြစ်သည့်အတွက် မည်သည့်လမ်းကို လိုက်မလဲဆိုတာသာ ​​ဒေါ်​​အောင်ဆန်းစုကြည် နှင့် NLDကို လိုလား​​ထောက်ခံသည့်သူများအ​နေဖြင့် စဥ်းစားစရာသာရှိ​ပေသည်။

NUG နှင့် ပူး​​ပေါင်းနေကြသည့် တိုင်းရင်းသား လက်နက်ကိုင်အဖွဲ့များအ​နေဖြင့်လည်း ကိုယ့်တိုင်းရင်းသားများ၏အကျိုး ကို​မျှော်ပြီး ပြည်တွင်းငြိမ်းချမ်း​ရေးလမ်း​ကြောင်းကတဆင့် ဖက်ဒရယ် ဒီမိုက​ရေစီပြည်​ထောင်စုကို ချဥ်းကပ်မလား၊ အသက်​သွေး​ချွေး​မြောက်မြားစွာ ဆုံးရှုံး​သော်လည်း မျှော်မှန်းလို့မရနိုင်သည့် အကျိုးဆက်သာ ဖြစ်လာနိုင်မည့် NUG ၏ လမ်း​ကြောင်းအတိုင်းဆက်သွားမလားဆိုတာကို ချိန်ဆသင့်ပါ​​ကြောင်း အကြံပြုလိုက်ရပါသည်။

​ဇော်နိုင်

TREND News ဂျာနယ်အတွဲ၂ ၊အမှတ်(၂၆)