၂၀၂၅ ၊ ဩဂုတ် ၂၈
နိုင်ငံရေးလုပ်လို့  လူတွေ မုန်းခြင်းခံရတယ်။ ချစ်ခင်နှစ်သက်တဲ့ သူတွေကအစ ရစရာမရှိအောင် ဆဲကြတယ်။ 
    V V Chen ကို အသုံးပြုပြီး မဲဆွယ်ရန် ကြိုးစားလာတယ်ဆိုပြီး  ပြည်သူ့ပါတီကို ဝေဖန် ထိုးနှက်ခဲ့သည့်ပို့စ်များ သြဂုတ်လဆန်းပိုင်းက လူမှုကွန်ရက်တွင် တွေ့ခဲ့ရသည်။ ကျန်းမာရေးရှုထောင့်မှနေ၍ knowledge Sharing လိင်ပိုင်းဆိုင်ရာ အသိပညာပေး Vlog များဖြင့် လူသိများ Cele ဖြစ်ခဲ့သူ V V Chen ပြည်သူ့ ပါတီဝင်အဖြစ် နိုင်ငံရေးလောကထဲ ဝင်ရောက်လာခဲ့မှုအပေါ် ဝေဖန်မှုများလည်း ဆက်တိုက်ထွက်ပေါ်ခဲ့သည်။ တစ်ဖက်တွင်လည်း Vlogger Cele အဖြစ်မှ နိုင်ငံရေးလောကထဲ ဝင်ရောက်လာမှုအပေါ် သတင်းမီဒီယာများ၏ အာရုံစိုက်မှုများ ရှိလာခဲ့သည်။ 

ပြည်သူ့ပါတီဝင်  V V Chen နှင့်တွေ့ဆုံ၍ ၎င်း၏ နိုင်ငံရေးရပ်တည်ချက်၊ ခံယူချက်၊ အမြင်သဘာထားများကို တွေ့ဆုံမေးမြန်းထားပါသည်။

TREND ။        ။ ဘလော့ဂါ (Vlogger) ဆယ်လီ တစ်ဦးအနေနဲ့ ဖြတ်သန်းခဲ့ရတဲ့ အခြေအနေ၊ ဘဝအစိတ် အပိုင်းလေးကို ပထမဆုံး ပြောပေးပါဦး။
V V C     ။    ။ ကျွန်မ Vlogger ၊ Influencer တစ်ယောက်အနေနဲ့ ရပ်တည်ခဲ့တာက တခြား Vlogger ၊ တခြား Influencer တွေနဲ့မတူတဲ့ ရပ်တည်မှုတွေကို ရပ်တည်ပြီးတော့ ရွေးချယ်ခဲ့တာပါ။ ဘာကြောင့် မတူတာလဲဆိုရင် ကျွန်မက Sex Education နဲ့ ပတ်သက်ပြီးတော့ ဒီနိုင်ငံမှာ တော်ရုံလုပ်ဖို့ မလွယ်ကူတဲ့ ခက်ခဲတဲ့အလုပ်ဖြစ်လို့ လုပ်ဖြစ်ခဲ့တာပါ။ Vlogger တစ်ဦးအနေနဲ့၊ Social  Influencer တစ်ဦးအနေနဲ့ ၂၀၂၀ အောက်တိုဘာလထဲက စလုပ်ဖြစ်ခဲ့တာပါ။ အဲဒီကာလတုန်းက လသာမြို့နယ်မှာ စားသောက်ဆိုင် ဖွင့်ထားပါတယ်။ အသက်(၂၂)နှစ်မှာ တရုတ်စားသောက်ဆိုင်ကို ကိုယ်တိုင်တစ်ယောက်တည်း ဖွင့်ပြီး‌တော့ ကိုယ်ပိုင် Rum တာ ဖြစ်ပါတယ်။ အဲဒီ ၂၀၂၀ မှာ ကိုဗစ်ဖြစ်တော့ ဆိုင်တွေပိတ်ထားရတဲ့အချိန် အိမ်မှာအချိန်ရတော့ ဘာလုပ်ရင်ကောင်းမလဲ‌ဆိုပြီး Research လုပ်ရင်းလုပ်ရင်းနဲ့ သိလာတာက  လိင်ပညာပေးနဲ့ ပတ်သက်ပြီး Sex Education သက်သက်ချည်းပဲလို့ပြောရင် တချို့လူတွေက လက်မခံဘူး။ သေချာတာကတော့ Sexual knowledge ပေါ့၊ အဲဒါတော့ ပြောလို့ရတယ်။ ဒါကြောင့် Sexual knowledge နဲ့ပတ်သက်ပြီး ဒီနိုင်ငံမှာလည်း လိုအပ်တဲ့အရာ ဖြစ်တယ်။ တခြားနိုင်ငံတွေမှာ လုပ်တာတွေကို Reference ယူပြီးတော့ ကျွန်မမိတ်ဆွေ ဆရာဝန်တွေရဲ့ ဝိုင်းဝန်းကူညီပေးမှုတွေ၊ ပြောမယ့် အကြောင်းအရာတွေကို Content တွေကို Creation လုပ်ပေးမှုတွေနဲ့စပြီး လုပ်ဖြစ်သွားခဲ့တာပါ။ အဲဒီကနေ Social ခေတ်မှာ ကျန်းမာရေးရှုထောင့်ကနေပြီး လူတွေ အလွယ်တကူ လေ့လာလို့ရအောင် လိင်ပညာပေး ဘလော့တွေ၊ ဗီဒီယိုတွေ တင်ဖြစ်သွားတယ်။ အဲဒီလိုနဲ့ ဖြတ်သန်းခဲ့တယ်၊ လူသိများခဲ့တယ်လို့ ပြောချင်ပါတယ်။

TREND ။        ။ လူသိများတဲ့ ဘလော့ဂါ ဆယ်လီအဖြစ်ကနေ နိုင်ငံရေးလောကထဲကို ဘာကြောင့် ဝင်ရောက်ဖြစ်ခဲ့တာလဲ။
V V C    ။    ။ တကယ်ကတော့ Vlogger ဘဝ၊ Influencer ဘဝကနေ နိုင်ငံရေးလောကထဲ ခုန်ဝင်လာတာ မဟုတ်ပါဘူး။ ကျွန်မအနေနဲ့က Influencer တစ်ယောက်အနေနဲ့ ရပ်တည်ခဲ့တာက နှစ်အချိန်တစ်ခုရှိခဲ့ပြီ။ ဒါကြောင့် Influencer Life ကနေ နိုင်ငံရေးလောကထဲ ဝင်လာတာလို့ ပြောလို့မရဘူး။ ကျွန်မရဲ့ Normal Life ကနေ နိုင်ငံရေးလောကထဲ ဝင်လာတာပါ။ ကျွန်မက လူငယ်တစ်ယောက်ဖြစ်တယ်။ ပြီးတော့ သာမန် Life ထဲမှာပဲ နေခဲ့တာလည်း အချိန်တစ်ခုရှိပြီ။ အရွယ်ရောက်ပြီးတဲ့ သာမန်လူငယ်တစ်ဦး ဖြစ်ပါတယ်။ ပြီးတော့ ကျွန်မနိုင်ငံရေးလုပ်ဖို့ စိတ်ကူးကတော့ အရင်ကတည်းက ရှိပါတယ်။ Plan လည်း လုပ်ထားပါတယ်။ အဲဒါကြောင့် ဝင်ဖြစ်ခဲ့တာပါ။

TREND ။        ။ နိုင်ငံရေးပါတီတွေအများကြီးရှိတဲ့အထဲက ပြည်သူ့ပါတီကို ဘာကြောင့် ရွေးချယ်ဝင်ရောက်ခဲ့တာလဲ။
V V C    ။    ။ ပြည်သူ့ပါတီက တခြားပါတီနဲ့ မတူပါဘူး။ ပြည်သူ့ပါတီမှာ ပါဝင်ဦးဆောင်ခဲ့တဲ့ ပုဂ္ဂိုလ်တွေစုထားတဲ့ ပါတီဖြစ်တယ်။ ၈၈ ကတည်းကဆိုတော့  သူတို့ရဲ့ နိုင်ငံရေးဖြတ်သန်းခဲ့မှုက အခုဆိုရင် ၃၇ နှစ်ရှိပြီ ဖြစ်ပါတယ်။ ဒါကြောင့်လည်း ပိုပြီးတော့ ယုံကြည်ချက်ရှိပြီးတော့ ပါတီရှေ့ဆက်ဆောင်ရွက်မယ့် နိုင်ငံရေးလုပ်ငန်းစဉ်တွေနဲ့ တွေးခေါ်မြော်မြင်မှု သဘောထားတွေက ကျွန်မရဲ့ ကိုယ်ပိုင်သဘောထားနဲ့ လုံး၀ ထပ်တူကျပါတယ်။ ဒါကြောင့် ပြည်သူ့ပါတီကိုဝင်ဖို့ ကျွန်မ ရွေးချယ်ခဲ့တာပါ။

TREND ။        ။ အဓိကက ဘယ်လိုစေ့ဆော်ချက်တွေကြောင့် နိုင်ငံရေးလုပ်ဖြစ်တာလဲ။
V V C     ။    ။ အမှန်အတိုင်းပြောရရင် အခုက  Transition ကာလပါ။ ဒီ Transition ကာလတွေအတွက် နိုင်ငံနဲ့ ပြည်သူတွေအတွက် အရေးကြီးပါတယ်။ ၂၀၁၀ ရွေးကောက်ပွဲ Transition ကာလတုန်းက လူတွေကသာ ရွေးကောက်ပွဲက အရေးမကြီးဘူးလို့ ပြောမယ်၊ အဲဒီလိုပဲ ပစ်ထားကြမယ်ဆိုရင် တိုင်းပြည်အရွေ့ တိုးတက်မှုက နှောင့်နှေးသွားမှာ။ အဲဒီတုန်းက အပြောင်းအလဲအတွက် မဲပေးခဲ့ကြတယ်။ လက်ရှိ အခြေအနေဆိုတာက အဲဒီတုန်းက ၂၀၁၀ Transition ကာလထက်ပိုပြီးတော့ အခက်အခဲအကျပ်‌အတည်းတွေ ရှိနေတယ်။ တကယ်လို့သာ ပြည်သူက ရွေးကောက်ပွဲကို စိတ်မဝင်စားဘူး၊ မလိုလား ဘူးဆိုရင် အဲဒီ ၂၀၁၀ ကာလ‌တွေထက် တိုင်းပြည်ဖွံ့ဖြိုးတိုးတက်ရေး ဆောင်ရွက်မှုက ပိုပြီး နှောင့်နှေးကြန့်ကြာသွား နိုင်ပါတယ်။ ဒါကြောင့်မို့လို့ ကျွန်မအနေနဲ့က Transition ကာလမှာ ဒီအခြေအနေထက် ပိုပြီးတော့ ကောင်းမွန်တဲ့ အခြေအနေဖြစ်ဖို့၊ မှန်ကန်တဲ့နည်းလမ်းနဲ့ မြန်မြန်ဆန်ဆန် ဖြေရှင်းဆောင်ရွက်သွားဖို့လိုတယ်။ ဒါမှ မြန်မြန်ရှေ့ကို ရောက်မှာ။ ဒါကြောင့်လည်း ကျွန်မအနေနဲ့က နိုင်ငံရေးထဲဝင်လာတာ ဖြစ်ပါတယ်။ အဓိက တွန်းအားကတော့ လက်ရှိရှိနေ‌တဲ့ အခြေအနေပါ။ နိုင်ငံမှာရှိနေတဲ့ လက်ရှိအခြေအနေတွေက ကျွန်မနိုင်ငံ ရေးလုပ်ဖြစ်ဖို့အတွက် အဓိကတွန်းအားဖြစ်ပါတယ်။ နိုင်ငံရေးမတည်ငြိမ်မှုတွေကို ကျွန်မနဲ့အတူတူ အားလုံးက ဒီအခက်အခဲတွေကို ခံစားခဲ့ရတယ်။ မျှော်လင့်ချက်တွေမဲ့တယ်။ ပဋိပက္ခဖြစ်တဲ့ ဒေသ၊ ပဋိပက္ခမဖြစ်တဲ့ဒေသ အားလုံးက ဒီအကျပ်အတည်းကို ရင်ဆိုင်ရတယ်။ ပဋိပက္ခမဖြစ်တဲ့ ဒေသတွေမှာ အခက်အခဲတွေကို ကြုံတွေ့နေရပြီဆိုရင် ပဋိက္ခဖြစ်တဲ့ ဒေသတွေက ပိုပြီး ခံစားရတာပေါ့။
    ကျွန်မက နဂိုကတည်းက နိုင်ငံရေးလုပ်ချင်ခဲ့တဲ့သူ၊ စိတ်ကူးပြီးသားဖြစ်လို့ ဒီလိုအခြေအနေတွေကို ဆက်ပြီးမဖြစ်စေချင်တော့ဘူး။ သာမန်လူတစ်‌ယောက်အနေနဲ့ ဒီအခြေအနေကို ဆက်ပြီး မဖြစ်စေချင်တော့တာ။ အားလုံးကျပ်တည်းနေတဲ့ အခြေအနေကို ပြောင်းလဲ‌စေချင်တဲ့ ဆန္ဒရှိပါတယ်။ အဲဒီဆန္ဒ အပေါ်မူတည်ပြီး နိုင်ငံရေးစလုပ်ဖို့ ဆုံးဖြတ်ဖြစ်ခဲ့တာ။

TREND ။        ။ လာမယ့်ရွေးကောက်ပွဲမှာ ပြည်သူ့ပါတီကိုယ်စားလှယ်လောင်းအဖြစ် ဝင်ပြိုင်ဖို့ရှိလား။
V V C    ။    ။ ရှိပါတယ်။ အခုထိကတော့ မဲန္ဒနယ်ကို သေသေချာချာ မသိသေးဘူး။ မဲဆန္ဒနယ်ရယ်၊ ဘယ်လွှတ်တော်အတွက် ဝင်ပြိုင်ရမလဲ‌ဆိုတာ မသိရသေးပါဘူး။ ဒါကြောင့် ရွေးကောက်ပွဲမှာ ကိုယ်စားလှယ်လောင်းအဖြစ် ဝင်ပြိုင်ဖို့ရှိတယ် ဆိုတာလောက်ပဲ ပြောလို့ရပါမယ်။

TREND ။        ။ ကိုယ်စားလှယ်လောင်းအဖြစ် ဝင်ပြိုင်ဖို့ရှိတယ်ဆိုတော့ လွှတ်တော်ကိုယ်စားလှယ် တစ်ဦးအနေနဲ့ ဘယ်လိုအရည်အချင်းတွေ ရှိသင့်လဲ။
V V C    ။    ။ အရည်အချင်းနဲ့ပတ်သက်ရင်တော့ ရှိသင့်တဲ့ အရည်အချင်းတွေ အများကြီးပါ။ နိုင်ငံ ရေးသမားတစ်‌ယောက်အနေနဲ့ လွှတ်တော်ထဲကို ဝင်တော့မယ်၊ နိုင်ငံ့အရေးကို တကယ်ကို တရားဝင်လုပ် ဆောင်တော့မယ်ဆိုရင် ဥပဒေပိုင်းဆိုင်ရာတွေ၊ နိုင်ငံတော်က သတ်မှတ်ထားတဲ့ ပညာအရည်အချင်းတွေ ရှိပါတယ်။ ဒါပေမဲ့ အဲဒီလို သတ်မှတ်ထားတဲ့ အရည်အချင်း တစ်ခုတည်းနဲ့ မရပါဘူး။ ဥပဒေအရပြောရရင် ၁၀ တန်းအောင်လက်မှတ်ရှိရင် ရပြီလို့ သတ်မှတ်ထားပေမယ့် နိုင်ငံ့အကျိုး၊ ပြည်သူ့အကျိုး ဆောင်ရွက်မယ့်သူက အဲဒါတစ်ခုရှိရုံနဲ့ မရပါဘူး။ နောက်တစ်ချက်က စီးပွားရေး အမြင်ရှိရုံနဲ့လည်း မရဘူး။ သမိုင်းကြောင်းတွေလည်း သိဖို့လိုအပ်ပါတယ်။ သေချာတာကတော့ ကိုယ်စားလှယ်တစ်ဦးအတွက်ရှိသင့်တဲ့ အရည်အချင်းတွေက အများကြီးပါပဲ။ စကားပြောဆိုတာကအစ သုံးလိုက်တဲ့ အသုံးအနှုန်း၊ ပြုမူပြောဆို‌ ဆောင်ရွက်မှုတွေကလည်း အရေးကြီးပါတယ်။ အဲဒါတွေကို ရွေးချယ်သုံးနှုန်းပြီး မှန်ကန်တဲ့ဆုံးဖြတ်ချက်၊ ချဉ်းကပ်မှုတွေ လုပ်ဆောင်နိုင်တဲ့ အရည်အချင်းတွေ ရှိသင့်တယ်လို့မြင်တယ်။

TREND ။        ။ ပါတီနိုင်ငံရေးကို  အမှန်တကယ် ထဲထဲဝင်ဝင်သိလို့ လုပ်တာလား၊ ပေါ်ပင်ဖြစ်ချင်လို့ နိုင်ငံရေးလောကထဲကို ဝင်တာလား။
V V C    ။    ။ ကျွန်မကတော့ အဲဒါကို စဉ်းတောင်မစဉ်းစားမိပါဘူး။ အထင်လွဲ‌နေကြတာပဲလို့ ထင်ပါတယ်။ ကျွန်မအနေနဲ့ ရိုးရိုးသားသားပြောရလို့ရှိရင် မြန်မာနိုင်ငံမှာ ဘယ်သူမှမလုပ်တဲ့ Sex Education၊ Sexual knowledge လိင်ပညာပေး Vlogge တွေ၊ ဗီဒီယိုတွေကို စွန့်ဦးတီထွင်ခဲ့တဲ့ အမျိုးသမီးငယ်တစ်ဦးအနေနဲ့ စပြီးလုပ်ခဲ့တဲ့သူ တစ်ယောက်ပါ။ အဲဒါကြောင့်မို့လို့ လူသိများဖို့၊ နာမည်ကျော်ကြားဖို့အတွက် နိုင်ငံရေးကို အသုံးချစရာအကြောင်း တစ်စက်လေးမှ မရှိပါဘူး။ အဲဒါ သိစေချင်ပါတယ်။ ကျွန်မနေနဲ့ကတော့ Vlogger တစ်ဦးအနေနဲ့ လူသိများပြီးသားပါ။ ကျွန်မက ပေါ်ပင်ဖြစ်ချင်လို့ နိုင်ငံရေးလောကထဲဝင်တယ်ဆိုရင် အကယ် ၍ ကျွန်မ ဝင်လိုက်မယ်၊ ပေါ်ပင်ဖြစ်သွားတယ်၊ နာမည် ကြီးသွားတယ်။ Trend ဖြစ်သွားတယ်။ ပေါ်ပြူလာဖြစ်သွားတယ်။ အဲဒီနောက်မှ ကျွန်မဘာရလိုက်ရမှာလဲ။ ရွေးကောက်ပွဲမှာ မနိုင်ဘူးဆိုရင် ကျွန်မဘာရလိုက်ရမှာလဲ။ ကျွန်မက လူသိများပြီးတော့ ကြော်ငြာ‌တွေတင် ရိုက်စားရမှာလား။ ရုပ်ရှင်တွေ တင်ရိုက်ရမှာလား။ အွန်လိုင်းပေါ်မှာ စီးပွားရေး လုပ်ရမှာလား၊ Follower တွေရတာလား။ ကျွန်မအနေနဲ့က ပြည်သူ့ပါတီဝင်တဲ့အကြောင်း ပဲခူးက ပြည်သူ့ပါတီရုံးခန်းဖွင့်ပွဲအခမ်းအနားမှာ စပြီး မိတ်ဆက်လိုက်တယ်။ ပါတီရုံးဖွင့်ပွဲ အခမ်းအနားပုံတွေ တင်လိုက်တယ်။ ကျွန်မ Page က Follower က လေးသောင်းကျော်၊ ငါးသောင်းနီးပါး လျော့သွားတယ်။ Personal အကောင့်မှာလည်း သုံးထောင်လောက် လျော့သွားတယ်။ ဒါတွေက လက်ရှိဖြစ်ပျက်တဲ့ အရာတွေပါ။ ကျွန်မက Follower တိုးချင်တာလည်း မဟုတ်သလို အဲဒီလို  Follower ကျနိုင်တယ် ဆိုတာမျိုးလည်း သိပါတယ်။ ကျွန်မအနေနဲ့ Facebook  Page က Follower ကို အားကိုးပြီး ပိုက်ဆံရှာနေတဲ့သူလည်း မဟုတ်ဘူး၊ စီးပွားရေးလုပ်နေတဲ့ သူတစ်ယောက် မဟုတ်တဲ့အတွက် ဒီအပေါ်မှာ ဘာမှမခံစားမိပါဘူး။ ပြီးတော့ ကျွန်မက ပေါ်ပင်တွေနောက် လိုက်တတ်တဲ့သူတွေ မဟုတ်ဘူး။ တခြားသူတွေ ကြိုက်ကြိုက် မကြိုက်ကြိုက် ကိုယ့်ယုံကြည်ချက်နဲ့ မှန်တယ်လို့ထင်ရင် လုပ်တတ်တဲ့သူ။ Sexual knowledge နဲ့ပတ်သက်ပြီး တစ်နိုင်ငံလုံးတိုင်းတာလို့ရှိရင် Myanmar Culture အရ၊ မြန်မာ့ယဉ်ကျေးမှုအရ Conservative ဖြစ်နေတဲ့နိုင်ငံမှာ Sexual knowledge ကို စိန်ခေါ်ပြီး လုပ်ခဲ့တာပါ။ အခုအချိန်အထိပါ၊ (ကန့်တော့၊ ကန့်‌တော့ပါ) ကျွန်မကို...သည်မ တစ်ယောက်လို ပြော‌ဆိုစွပ်စွဲပြီးတော့ စော်ကားနေတာတွေ အခုအထိ ခံနေရတုန်းပါ။ ဒါပေမဲ့ ကျွန်မက ခံယူချက်မှန်တယ်‌ဆိုရင် လူမုန်းလည်း ခံရဲပါတယ်၊ လူဆဲတာလည်း ခံရဲပါတယ်။ ကျွန်မက ပေါ်ပင်ဖြစ်ချင်လို့၊ နာမည်ကြီးဖို့ နိုင်ငံရေးလုပ်တာမဟုတ်ဘူး။ ကိုယ့်ရဲ့ခံယူချက်၊ ရပ်တည်ချက် မှန်တယ်ထင်လို့ လုပ်တာဖြစ်တယ်။ ပေါ်ပင်ဖြစ်ချင်လို့ နိုင်ငံရေးလုပ်တယ်‌ဆိုရင် ကျွန်မရဲ့ ရလဒ်မှာ ကောင်းသောရလဒ်နဲ့ ဆိုးသောရလဒ်ပေါ့။ ကောင်းသောရလဒ်က ဘာရှိမလဲ၊ ခဏတာ ပေါ်ပင်ဖြစ်သွားမယ်၊ Trend ဖြစ်သွားမယ်၊ လူစိတ်ဝင်စားသွားမယ်။ ဒါက လူသိများချင်တယ်‌ဆိုလို့ရှိရင် ရလာမယ့် ကျွန်မအတွက် ကောင်းသောရလဒ်ပေါ့။ လူသိများတာ ကောင်းတယ် ဒါပေမဲ့ အဲဒီလူသိများတဲ့အပေါ် ကျွန်မ ဘာမှလုပ်မစားဘူး။ ဝင်ငွေလည်း မရှာဘူး၊ စီးပွားရေးလည်း မလုပ်ဘူး။ Follower အားကိုးနဲ့ စီးပွားရှာမယ့်သူလည်း မဟုတ်ဘူး။ အဲဒီလူသိများတဲ့အပေါ်မှာ ကျွန်မကိုယ်ကျိုးစီးပွားအတွက် အသုံးမချဘူး။ လူသိများတဲ့အတွက် ကျွန်မအတွက် အကျိုးရလဒ် ဘာမှမရှိဘူး။ ပေါ်ပင်လုပ်ခြင်းဟာ ကျွန်မအတွက် ဘာအကျိုးမှမရှိဘူး။ ကျွန်မနိုင်ငံရေးလုပ်တဲ့အတွက် ဆိုးကျိုးတွေက အများကြီးပဲ။ ကျွန်မ က Follower အားကိုးပြီး အလုပ်မလုပ်ပေမယ့် ရှိပြီးသား Follower တွေ အများကြီး လျော့သွားတယ်။ ပြီးရင် ကျွန်မနိုင်ငံရေးလုပ်လို့ လူတွေရဲ့ မုန်းခြင်းခံရတယ်။ အရင်က မေတ္တာရှိတဲ့၊ ချစ်ခင်နှစ်သက်တဲ့ သူတွေက အစ ရစရာမရှိအောင် ဆဲဆိုတာတွေကို ခံရတယ်။ ကျွန်မကို သိက္ခာကျအောင် တမင်ဖန်တီးပြီး ပြောဆိုနေကြတယ်။ တကယ်လို့သာ ကျွန်မရွေးကောက်ပွဲ ဝင်ဖြစ်တယ်။ ရွေးကောက်ပွဲမှာ မနိုင်ခဲ့ဘူးဆိုရင် ဘာဖြစ်မလဲ၊ အဲဒီ Risk ကိုလည်း ယူရတယ်။ နာမည်ပျက်ရုံ၊ သိက္ခာအချခံရရုံ၊ အဆဲခံရရုံသက်သက်နဲ့ ကျွန်မဘာရလဒ်မှ ရမလာဘဲ ရှုံးသွားမယ်ဆိုရင် ဖြစ်ပေါ်လာမယ့် အခြေအနေ‌တွေကို၊ Risk ကို ရဲရဲယူပြီး လုပ်နေတာပါ။ ကျွန်မက ကိုယ်အကျိုးအတွက်၊ ဒါမှမဟုတ် အများအကျိုးအတွက် ကောင်းတဲ့ရလဒ်၊ ကောင်းတဲ့ အကျိုးရှိတာကိုပဲ လုပ်တယ်။ ဘယ်သူ့အတွက်မှ အကျိုးမရှိတဲ့ လုပ်ရပ်ကိုဘာ တစ်ခုမှ မလုပ်ချင်ဘူး။ အကျိုးကိုပဲ ကြည့်တယ်။ အဓိပ္ပာယ်မရှိတဲ့ လုပ်ရပ်တွေကို လုပ်တတ်တဲ့သူ မဟုတ်ဘူး။ ဒါကြောင့် ကျွန်မအနေနဲ့ ပြောချင်တာက  ပေါ်ပင်ဖြစ်ချင်လို့ နာမည် ကြီးဖို့ နိုင်ငံရေးလောကထဲ ဝင်လာ တာမျိုး မဟုတ်ပါဘူး။

TREND ။        ။ ကိုယ့်အတွက် ကောင်းကျိုးနည်းပြီး ဆိုးကျိုးတွေများနေတဲ့ ဒီနိုင်ငံရေးလောကထဲ ဝင်လာမိတဲ့အတွက် နောင်တရလား။
V V C    ။    ။ နောင်တမရပါဘူး။ ဒီအခြေအနေ‌တွေ ဖြစ်လာမယ်ဆိုတာ ကျွန်မကြိုတွေးပြီးသား၊ ကြိုတွက်ပြီးသားပါ။ ဒါတွေကို မသိလို့လုပ်တာမဟုတ်ဘူး။သိသိကြီးနဲ့ ကျွန်မ Risk ယူတာပါ။ ဒါကြောင့် ကျွန်မ နောင်တမရပါဘူး။

TREND ။        ။ လူ့လောကမှာလည်း လောကဓံဆိုတာရှိသလို၊ နိုင်ငံရေးလောကမှာလည်း နိုင်ငံရေး လောကဓံ အတက်အကျအနိမ့်အမြင့်တွေ ရှိနေပါတယ်။ နိုင်ငံရေးလောကဓံလှိုင်းတွေအတွက် ဘယ်လောက်အထိ ပြင်ဆင်ထားပြီးပြီလဲ။
V V C    ။    ။ နိုင်ငံရေးဆိုတာက အဖွဲ့အစည်းတစ်ခုနဲ့ လုပ်ရတဲ့အလုပ်ဖြစ်တယ်။ ဒါကြောင့် စီးပွားရေး အပါအဝင် တခြားနယ်ပယ်တွေမှာလည်း အဖွဲ့အစည်းနဲ့ လုပ်ရတဲ့အရာတွေ ရှိတယ်။ အဲဒီအချိန်မှာ အဖွဲ့အစည်းကပေးတဲ့ ဖိအားတွေ၊ ပြီးတော့ ပြင်ပက ဖိအားတွေစတဲ့ ဖိအားအမျိုးမျိုးကို ရင်ဆိုင်ရခြင်းဟာလည်း လောကဓံတစ်ခုပဲလို့ သတ်မှတ်ရမယ် ထင်ပါတယ်။ သဘောတရားအရကတော့ အတူတူတွေ ပဲလို့ ထင်ပါတယ်။ ဒါပေမဲ့ နိုင်ငံရေးကတော့ ပိုပြီး အသေးစိတ်တယ်၊ လေးနက်တယ်လို့ ထင်ပါတယ်။ ရွေးကောက်ပွဲနဲ့ ဥပမာပြောရမယ်ဆိုရင် နိုင်တဲ့သူက နိုင်တယ်၊ ရှုံးတဲ့သူကရှုံးတယ်။ ရှုံးသွားလို့ရှိရင်လည်း ဒီအရှုံးကို လက်ခံရမယ်။ အရှုံးကို လက်ခံနိုင်ရမယ့်စိတ်ကို ပြင်ဆင်ရမယ်။ အများကြီး မျှော်မှန်းထားပြီးတော့မှ မျှော်လင့်ချက်တွေ မဲ့သွားတာမျိုး၊ ရည်မှန်းချက်‌တွေ ယိုင်လဲသွားတာမျိုးတွေဟာ လောကဓံတရားတွေပါပဲ။ နိုင်ငံရေးမှာ ဖိအားတွေများ စွာရှိသလို အဖွဲ့အစည်းအတွင်းရော၊ အဖွဲ့အစည်း ပြင်ပမှာရော ပြီးရင် ပြည်သူလူထုနဲ့ ဆက်ဆံရေးတွေမှာရောက လောကဓံတရားတွေ ရှိပါတယ်။ နိုင်ငံရေးမှ မဟုတ်ပါဘူး တခြားသော နယ်ပယ်တွေ လူမှုရေး၊ စီးပွားရေးတွေမှာလည်း လောကဓံကို ရင်ဆိုင်ရတာပဲ။ ဒီရင်ဆိုင်လာရတဲ့ လောကဓံက မတူကြတာ အနည်းငယ်ကွဲပြားတာမျိုးပဲ ရှိပါတယ်။ အဓိကကတော့ အဲဒီလောကဓံအပေါ်မှာ ခံနိုင်ရည်ရှိရှိ ကျော်လွှားဖို့၊ ကျော်ဖြတ်ဖို့တော့ လိုပါတယ်။ နိုင်ငံရေးလောကဓံ အလှည့်အပြောင်းတွေအတွက် ပြင်ဆင်ထားပါတယ်။ ဒါပေမဲ့ အဲဒီလို ပြင်ဆင်ထားတယ်‌ ဆိုပေမယ့် အမှန်တကယ် ကြုံလာရတဲ့ အတိုင်းအတာတွေအပေါ် မူတည်ပြီးတော့ ခံနိုင်ရည်ရှိလား၊ မရှိဘူးလားဆို တာက ကိုယ့်ရဲ့ စိတ်ဓာတ်ကြံ့ခိုင်မှုအပေါ် မူတည်တယ်။ ကြုံတွေ့လာတဲ့ နိုင်ငံရေးလောကဓံအပေါ် မူတည်ပြီးတော့ အကောင်းဆုံးကရမယ့်ဇာတ်ပေါ့။ ဒါကြောင့် နိုင်ငံရေးလောကဓံကို ခံနိုင်ရည်ရှိဖို့ ပြင်ဆင်ထားပါတယ်။ အရင်တုန်းက နိုင်ငံရေးလုပ်တယ်‌ဆိုတာ ထောင်ကျတာလောက် အထိပါပဲ။ သေဒဏ် လောက်အထိကတော့ ခဲယဉ်းတယ်လို့ မြင်တယ်။ ဒါပေမဲ့ လက်ရှိအခြေအနေက အဖြူအမည်း ကြားမှာလုပ်နေရတာ ဖြစ်တယ်။ အချိန်မရွေးလည်း လမ်းပေါ်မှာ ပစ်ခတ်ခံရတာမျိုး ဖြစ်နိုင်တယ်။ ပြီးတော့ လက်နက်ကိုင် ပဋိပက္ခကလည်း ကျယ်ပြန့်နေတာကြောင့် ဒီလိုအန္တရာယ်တွေကြားမှာ နိုင်ငံရေးလုပ်တယ်‌ဆိုတာက အရင်ကထက် ပိုပြီး Risk များပါတယ်။ ဒါမျိုး‌တွေလည်း ကြိုပြီးတော့၊ စဉ်းစားထားပြီးတော့ ပြင်ဆင်ထားပါတယ်။ ပြင်ဆင်တယ် ဆိုတယ်ဆိုတာက စိတ်က အဓိကဖြစ်လို့ စိတ်ကို ပြင်ဆင်ရမှာပါ။ စိတ်က ပြင်ဆင်ထားပြီးပြီ ဘာပဲဖြစ်လာဖြစ်လာ လက်ခံနိုင်ဖို့ ဆုံးဖြတ်ထားပြီးပြီ‌ဆိုရင် ဘာပဲဖြစ်လာဖြစ်လာ လက်ခံနိုင်ရမယ်။ ကောင်းတာပဲဖြစ်ဖြစ်၊ ဆိုးတာပဲဖြစ်ဖြစ် ပြင်ဆင်ရမယ်။ ထောင်ကျတာတို့၊ အသက်သေဆုံးတဲ့အထိ ဖြစ်မှာတို့အတွက် ပြင်‌ဆင်ထားပြီးပါပြီ။

TREND    ။    ။ အခုလို ဖြေကြားပေးတဲ့အတွက် ကျေးဇူးတင်ပါတယ်။
(ညီသစ်)

(TREND News ဂျာနယ်အတွဲ(၄)၊ အမှတ်( ၃၂ ) တွင်ပါရှိသော အင်တာဗျူးအား တဆင့်ပြန်လည်မျှဝေခြင်းဖြစ်ပါသည်။ )